By Tjokkies leef ons ons leuse “Net My Beste” elke dag uit. Dit verwoord ons strewe om die volle doel van onderwys en opvoeding sinvol saam te bind – Christelik, Akademies, Sosiaal en Waardegedrewe. Met sterk waardes leer ons ons kinders op ‘n kaalvoetmanier om eers stewig te staan, sodat hulle later met selfvertroue die skoene van die lewe kan dra.

Ons leuse dien as fondasie waarop die hoeksteen reeds in 1970 gebou is en waar karakter, deursettingsvermoë en verantwoordelikheid daagliks vorm aanneem. Met die genade van ons Hemelse Vader streef ons daarna dat hierdie skool nie net sy merkwaardige naam in die Suid Afrikaanse onderwyslandskap sal behou nie, maar meer nog – dat Tjokkies ‘n vlagskipskool, ‘n baken van hoop en ‘n ligtoring vir Afrikaansonderwys sal wees.

Ons is ‘n waardegedrewe skool, waar aandag aan kwaliteit opvoeding en deeglike opleiding gegee word. Deur die jare het Tjokkies homself bewys as ‘n skool wat werklik omgee – vir kinders, gesinne en die gemeenskap.

Met ‘n stewige grondslag wat reeds in die ouerhuis gelê is, stap ons by Tjokkies saam met die kind, stap-vir-stap, om hulle voor te berei vir die uitdagings van die lewe. Mag jy aan die einde van jou kind se laerskoolloopbaan met trots – en ‘n tikkie hartseer – terugkyk op die suksesvolle reis, met die wete dat jou kind, wanneer hy of sy Tjokkies verlaat, gereed sal wees vir die Hoërskool.